John 12

Maria kwasaꞋopa boꞋwagah Jisasi

(Mt 26:6-13; Mk 14:3-9)

1Nimeguf wanom wanom ataꞋ mapoma esis Juda sondaꞋ gwaꞋaimi amama luꞋwami Pasova. Nemaf anama Jisas nataga wambel Betani, alupunai Lasarus napoma. FowaꞋ nagaꞋma Jisas nafelana nohafel wapotiꞋ. 2EaꞋ sandaꞋmana gwaꞋaimi Jisas. Marta kwandaꞋ gwaꞋaimi, eaꞋ Lasarus nape nalomas sape saꞋ gwaꞋaimi saloma Jisas. 3EaꞋ Maria kwahapila anona kap siꞋinama sanda buꞋwami agilima nad satalom otamba hiami. EaꞋ kwahapilam kwakoloꞋwam kwasaꞋopa boꞋwagah Jisasi kwandaꞋ auf balaga akoꞋunai kwandisamana boꞋwagah ananimi. EaꞋ ipat anama siꞋinama alogw buꞋwami ma sanda amama. 4EaꞋ anona alupunai Jisasi Judas Kariotinai kowalana ma sanda amama nandaiwaꞋma kwakoloꞋwam kwasapalom. Aman anama nambimb neawalapa Jisas niꞋipa amam naumbih ma meahana.

5EaꞋ Judas naꞋipas naꞋi, “IꞋi afaꞋ ofaꞋ sanda amama enis epes soseꞋafa moni 300 kina sotalom ofaꞋana osoꞋ epes isima kwahusa gwaꞋaimi maim, wila. OwaꞋetin.”

6EaꞋ Judas okom ananinai ina naꞋi nigiambama isima kwahuwisi, owaꞋ. Anan naꞋiam naꞋama ma nondaꞋ wal nofaꞋ otamba amama. DeiꞋ main, anan numafi bek anama Jisas naloma alupumi ananimi maoloꞋ otamba amamimi matoloꞋma. EaꞋ hihif Judas nakoalopam otamba amama.

7EaꞋ Jisas nagwamana basef naꞋi, “IpeꞋ owaꞋ piꞋipakwa basef amama, owaꞋ. AndeandeꞋma akwaꞋw kwakoloꞋwa sanda amama ma nambimb nemaf anama eagaꞋanai ma seawe. Isima kwahusa gwaꞋaimi maim sape salomepa nimeguf hiami. EaꞋ aeꞋ ina epe elomepa nogota laona, owaꞋ.”

Amam pris dambami maꞋi basef mandameꞋmama moha Lasarus neagaꞋ

9Esis Juda hiesi sameꞋ basefa Jisas nape Betani. EaꞋ safiꞋi saꞋi sotolona eaꞋ saꞋi siti Lasarus wapotiꞋ, nimbewaꞋ nagaꞋma Jisas nafelana nehafel wapotiꞋ. 10EaꞋ amam pris dambami maꞋi basef mandameꞋmama moha Lasarus neagaꞋ wapotiꞋ. 11DeiꞋ main, enis Juda hiesi sati Lasarus netanima nehafel ambal napaina. Amama atom deiꞋ sakwaha amam dambami Juda safeꞋ saila Jisas sembaleꞋefana.

Jisas nawis Jerusalem siꞋi dembinai king

(Mt 21:1-11; Mk 11:1-11; Lu 19:28-40)

12Wafilu epes hiesi safiꞋmai gwaꞋaimi amama Pasova, sameꞋ basefa Jisas ataꞋ nafiꞋi etin Jerusalem. 13EaꞋ satopaꞋ agof lawahim apulima sahapilam safiꞋi satagamana eaf. EaꞋ soga saꞋi mehip saꞋi,

“Hosana. ApeꞋ mandanifel endilisi ma ineꞋ. ApeꞋ maꞋi God nofaloꞋma ineꞋ nafiꞋi agel ananinai neseꞋena pepel nendaꞋ opeh ananimi. IneꞋ king dembinai apeꞋ Israeli.”
14EaꞋ Jisas nagolopa donki atotona noganai natolona nandagia natomana nafeꞋ siꞋi fowaꞋ anom basef Godi mail buk Baibeli maꞋi,

“IpeꞋ wambel Saion, ipeꞋ ina umbamehepa, owaꞋ. Dembinai king ipeꞋinai anona nemaf notoma donki noganai nofaꞋana nifiꞋi.”
16Nemaf anama alupumi Jisasi ina mogawa basef amama ofagema maꞋi Jisas, owaꞋ. Ama nogota anama Jisas nagaꞋ ma nahafel wapotiꞋ notanima nolata ilif, wila amam mogawa basef amama maꞋi anan. EaꞋ amam ukup mapoma amama epes isima sandaꞋmanam anan wapotiꞋ.

17Enis epes saliꞋ sati Jisas nofala aman anama naꞋi Lasarus napani hiꞋagif nehafel wapotiꞋ. EaꞋ saꞋipa hiesi ma basef amama Lasarusi. 18EaꞋ epes hiesi sameꞋ basefa Jisas nandaꞋ ikwaf anama luꞋunai nafela Lasarus hiꞋagif. EaꞋ deiꞋ safeꞋ satolona. 19EaꞋ amam Farisi mandaꞋipama maꞋi, “Opeh afaꞋimi ina laꞋifim, owaꞋ. AfaꞋ agof aꞋafa. Piti amam nematawa hiesi safiꞋmai anan atona hiꞋalas.”

Enis Grik saꞋi siti Jisas

20Epes hiesi safeꞋ Jerusalem ama gwaꞋaimi amama luꞋwami sondaꞋ lotuma God. EaꞋ anom Grik wapotiꞋ mafeꞋ malomas. 21Anona aman alupunai Jisasi Filip anan Betsaidainai etap hiagoma Galili. Amam Grik mafiꞋmai gwaꞋaimi amama eaꞋ mafiꞋmai Filip maꞋipana maꞋi, “Dembinai, afaꞋ waꞋi uti Jisas.”

22EaꞋ Filip nafeꞋ naꞋipa Andru, amam biam mafeꞋ maꞋipa Jisas. 23EaꞋ Jisas nagwamama basef naꞋipam naꞋi, “AeꞋ ataga epen endilisiwei afiꞋi. Nogota anama nataga eaꞋ God nihiꞋamba epes hiesi ma nafifili pepel aeꞋanai. 24AeꞋ aꞋipipa basef endilisimi, iꞋi olelemb witimi owaꞋ mowa etap nomon, olelemb amama moꞋoh etifim. EaꞋ iꞋi mowa mowala etap nomon, wila amama motaga molo mil hiami. 25Emi egafis ukup mopoma ambagof asasimi atom, siꞋi sihapilam laꞋifim, anona nemaf ambagof asasimi higililam. EaꞋ emi egafis ukup mopoma aeꞋ ma sosambala ambagof asasimi etap anaeꞋ, anona nemaf God nofaꞋas sotanimani sope andeandeꞋ laꞋelaꞋef hihif. 26Emi egafis siꞋi sondaꞋ opeh aeꞋami, esis sila aeꞋ. Mamagoma aeꞋ eapoma, isima sandaꞋ opeh aeꞋami esis sope soloma aeꞋ. EaꞋ emi egafis sondaꞋ opeh aeꞋami, Ahalome aeꞋanai nambimb nefela agof asasimi motaga luꞋum.”

Anan nataga epen endilisinai nambimb sundana lawag usiꞋinai tuꞋwanainai

27EaꞋ Jisas naꞋipam wapotiꞋ naꞋi, “DeiꞋ opaf aeꞋanai nataga aona. AeꞋ basef owaꞋetina ieꞋiam. Atuwasi aeꞋ iꞋi, ‘Ahalome, nekwahome nimanimi amama maꞋi meatagama aeꞋ deiꞋi?’ OwaꞋ. AeꞋ afiꞋi nogota anaeꞋ ape etap anaeꞋ ma opeh amama atom aeꞋ endaꞋama sehe egaꞋ. 28Ahalome, ineꞋ nendaꞋama epes hiesi sefela agel ineꞋinai luꞋuna.”

EaꞋ anona maf naꞋi nataga heven naꞋi, “AeꞋ andaꞋama sefela agel aeꞋanai notaga luꞋuna, eaꞋ atuwasi endaꞋana notaga luꞋuna wapotiꞋ.”

29EaꞋ enis amam nematawa hiesi saitu sameꞋ maf anama saꞋi, “OwaꞋ, otaga dililiwala.”

EaꞋ enis saꞋi, “Anona ensel naꞋipana anom basef.”

30EaꞋ Jisas naꞋi, “Maf anama ina naꞋi ma niegiambama aeꞋ, owaꞋ. Anama naꞋi ma nigiambama ipeꞋ. 31DeiꞋ Ahalome God nawaloga wafa amam nematawa hiesi sape etap anaeꞋ eaꞋ natofa dembinai aonai numafi etap anaeꞋi. 32Nambimb esis sundi il etin lawag usiꞋinai tuꞋwanainai ilifa nambimb ihindiꞋai esis amam nematawa hiesi sifiꞋmai aeꞋ.”

33Jisas naꞋipas naꞋama ma nihiꞋambas sogawa eaf anan nambimb neagaꞋanai.

34EaꞋ esis sagwamana basef saꞋi, “MiꞋuli apeꞋinai naꞋi naꞋama naꞋi, Krais anan nope laꞋelaꞋef hihif. DeiꞋ maina ineꞋ naꞋi, ‘Anan nataga epen endilisinai nambimb sundana lawag usiꞋinai tuꞋwanainai ilif?’ Dembinai nataga epen endilisinai, anan emi egafuna?”

35EaꞋ Jisas nagwamasa basef naꞋi, “Nogota ataꞋ bandana ma nogwapin nafifili nope nolomepa. DeiꞋ ipeꞋ pefeꞋ howalagoma. NaꞋama owamb neatagamepa. Emi egafis seafeꞋ owambi, esis ina sogawa anama seafeꞋma, owaꞋ. 36AeꞋ ape siꞋi nogwapin ipeꞋiwei. IpeꞋ pembaleꞋefa nogwapin anama ma petaga awasi nogwapin nafifili.”

Jisas naꞋipas eaꞋ, nakwaha esis nafeꞋ nandambahoꞋmas.

Esis Juda hiesi owaꞋ sembaleꞋefa Jisas

37Jisas nandaꞋ ikwaf laꞋifinai hianai, eaꞋ esis satolona. EaꞋ esis ina sembaleꞋefana, owaꞋ. 38SiꞋi basef amama fowaꞋ gani profet Aisaia naꞋiami deiꞋ mataga mandawalap alihim maꞋi,

“Anona nemaf epes emi egafis sombaleꞋefa basef afaꞋimi? Esis siti pepel Godi esis emi egafis? OwaꞋetin.”
39Esis ina laꞋifisa sombaleꞋefa Jisas. DeiꞋ main, profet anama Aisaia nandaꞋ anom basef Godi wapotiꞋ maꞋiam naꞋama maꞋi,

“Anan nandaꞋ naep asasimi maseꞋas nandaꞋ ukup asasimi maseꞋ ma ina anona nemaf sotologon eaꞋ ukup asasimi wapotiꞋ ina anona nemaf sogawa ma seamboma opalefa aeꞋ endaꞋas boꞋwes, owaꞋetin.”
41FowaꞋ gani Aisaia nati pepel howalogon Jisasi eaꞋ naꞋiam naꞋama ma anan atona.

42Amam agufumi hiami mombaleꞋefa Jisas. EaꞋ, amam umbamahama amam Farisi dambami. EaꞋ amam ina mawalapa basef maꞋipasam alihim, owaꞋ. Umbamahama amam Farisi mogaloꞋmama ina ataꞋ moloma esis Juda mondaꞋ lotu wapotiꞋ, owaꞋ. 43Amam agufumi amama ukup maꞋi epes seafela agof amamumi atom luꞋum. EaꞋ amam ina ukup maꞋi God nefelam agof amamumi, owaꞋ.

Basef Jisasi anona nemaf mowaloga epes hiesi

44EaꞋ Jisas naꞋipas mehip naꞋi, “Emi egafis sembaleꞋefa aeꞋi, esis ina sembaleꞋefa aeꞋ atowe, owaꞋ. SembaleꞋefa anan nasapaꞋe afiꞋi wapotiꞋ. 45Emi egafis siti aeꞋi esis sati anan nasapaꞋe afiꞋi wapotiꞋ. 46AeꞋ afiꞋi etap anaeꞋ siꞋi anona nogwapin ma emi egafis sembaleꞋefa aeꞋi, esis ina sope owamb, owaꞋ. 47Emi egafis semeꞋ basef aeꞋami ma owaꞋ seambaleꞋefam sielam, aeꞋ ina anona nemaf ewaloga esis, owaꞋ. DeiꞋ main? AeꞋ ina afiꞋi etap anaeꞋ ma eawaloga epes etapasi, owaꞋ. AeꞋ afiꞋi ma efaꞋas sotanimani. 48Emi egafis sewaꞋ alafugama aeꞋi ma esis owaꞋ seambaleꞋefa aeꞋ, anona nemaf anona dembinai jas nowaloga esis. Nemaf anama akutainai basef amama atom aeꞋ aꞋiami mowaloga epes isima. 49DeiꞋ main? AeꞋ ina aꞋi anom basefa okom aeꞋanai atona naꞋiami, owaꞋ. Ahalome aeꞋanai atona naꞋipi basef amama mehip eaꞋ aꞋipasam. EaꞋ anan nasapaꞋe afiꞋi aꞋiam siꞋi okom ananinai naꞋiam. 50AeꞋ egawa basef ananimi mawalapa ambal namunai ma ipeꞋ pepe andeandeꞋ laꞋelaꞋef hihif. NaꞋama basef aeꞋ aꞋipasami amama atom siꞋi Ahalome naꞋipiami.”